الرئيس السيسي: الدولة المصرية ثابتة ومستقرة ونسعى لإيقاف إطلاق النار

الأربعاء، 12 مارس 2025 09:37 م

جانب من الاجتماع

وجه الرئيس عبد الفتاح السيسي، رئيس الجمهورية، الشكر لأهالي الطلبة المستجدين المنضمين للقوات المسلحة وباقي مؤسسات الدولة، قائلا: " برحب بيكم.. أهلا وسهلا سعداء بوجودكم معانا وسعداء بالتواجد معاكم.. ولما عرفنا أنكم هتكونوا موجودين في رمضان قولنا فرصة أن نلتقي بيكم وبنشكركم على أبنائكم اللي بقوا في الأكاديمية أو باقي مؤسسات الدولة".

وأضاف الرئيس السيسي خلال لقاءه مع أعضاء هيئة التدريس بالأكاديمية العسكرية المصرية والطلبة المستجدين وأسرهم وعدد من دارسى الدورات المدنية، بمناسبة ذكرى العاشر من رمضان، بتشوفوا صورة شكل.. لكن حرصنا جدا خلال السنوات الماضية على تطوير كبير وقولت من كام يوم هنا للزملاء هنا أن عملية التطوير مستمرة ولن تنتهي.. ومش نعمل حاجة النهاردة ونقول دي الحاجة المثالية وخلاص.

نص كلمة الرئيس السيسي كاملة:

برحب بيكم.. أهلا وسهلا سعداء بوجودكم معانا وسعداء بالتواجد معاكم.. ولما عرفنا أنكم هتكونوا موجودين في رمضان قولنا فرصة أن نلتقي بيكم وبنشكركم على أبنائكم اللي بقوا في الأكاديمية او باقي مؤسسات الدولة.
بتشوفوا صورة شكل.. لكن حرصنا جدا خلال السنوات الماضية على تطوير كبير وقولت من كام يوم هنا للزملاء هنا أن عملية التطوير مستمرة ولن تنتهي.. ومش نعمل حاجة النهاردة ونقول دي الحاجة المثالية وخلاص.
عاوز اقولكم الكلام المعمول دلوقتي محاولة مننا كدولة ومؤسساتها أنها تعمل تطوير للأداء والمستوي.. مش بس شكل كويس.. البرنامج أعمق من كده بكتير وعملها متخصصين مش احنا.. متخصيين من أساتذة الجامعات فى علم النفس والاجتماع والسلوكيات والبرامج المعرفية.
الطلاب المستجدون اللى موجودين معانا هياخدوا مستوي معرفي جيد جدا سواء كان هندسة او هندسة حاسبات أو ساسية واقتصاد أو علوم اللوجيسيات.
حاولنا إعداد شخصية متكاملة قادرة على إدارة الأمور بشكل علمي وبشكل حرفي جدا جدا.. حبيت اقول الكلمتين أن الطلاب زي ما كنت موجودة فى الأسر مهتمة وحريصة.. هنا نفس الاهتمام وفى أيد أمينة ويحصلوا على الرعاية الكاملة من الاحترام والتقدير والعلوم والمهارات المختلفة.
عاوز اشكركم أنه خلال عملية الانتقاء والاختيار.. ومش بنقول كلام أننا قاعدين مع بعض.. اللي احنا فيه أفضل اللي موجود من كل التخصصات.. ده الأفضل.. وده معناه أن الأسر والأهالي قاموا بجهد كبير ورعاية كبيرة واشكركم على هذا الأمر.
هقول كلمة واحدة مهمة اوي.. بحس أن المصريين قلقانين وده أمر جيد لأن الأحداث اللى جنب مننا تدعو للقلق.. طالما الشعب المصري متماسك وعلى قلب رجل واحد.. اي تحدي بفضل الله هنقدر نتجاوزه وزي ما انتوا شايفين العالم مش بس المنطقة بتدور فيها أحداث متسارعة ومتناقضة أحيانا.. الحفاظ على الدولة المصرية ومقدراتها شغلنا الشاغل.
تعاملنا مع كل القضايا والتحديات بحسابات دقيقة جدا وبتريث وصبر كبير جدا.. عزائي الوحيد ان شعب مصر ودي مش مجاملة والله.. هو اللى مخلي الأمور رغم قساوتها وظروفها الصعبة نقدر نجابهه.. بيكم أنتم المصريين وقبلنا الله سبحانه وتعالي اللى مطلع علينا وشايف بندير الأمور ازاي.. بنسعي للتهدئة وإيقاف إطلاق النار ومنع المنازعات وعمل كل ما يمكن لتهدئة وإيقاف الصراعات والاقتتال والحروب.
الدولة المصرية ثابتة ومستقرة.. بالله لأنه مطلع علينا وعلى تصرفاتنا.. والوجود مش ماشي لوحده.. ده ليه صاحب واحنا حريصين فى إدارة الأمور ونراعي ما أمكن أن الله مطلع علينا وهيحاسبنا كلنا.
احنا بخير وأمان وسلام وبفضل الله.. وبفضل الله بفضل الله لن يستطيع أحد مش علشان احنا موجودين قادرين.. علشان هو موجود وكل سنة وأنتم طيبين.

Short Url

أخبار متعلقة